७ गविसबाट ५० करोडको अदुवा निर्यात

जिल्लाका पहाडी १७ गाविसबाट यस वर्ष ५० करोडभन्दा बढीको अदुवा भारत निर्यात भएको छ । जिल्ला कृषि कार्यालयका अनुसार ४० वर्षयता सबैभन्दा बढी मूल्यमा अदुवा बिक्री भएको हो ।

भारत निर्यात हुने अदुवा विभिन्न औषधि बनाउन प्रयोग गरिन्छ । गत वर्ष सुठो धार्नीको २ सय ५० रहेकामा यस वर्ष ६ सयभन्दा बढीमा बिक्री भएको हो । यो

किसानको जीविकोपार्जनको आधार भएको छ । यसबाट जिल्लाका पहाडी क्षेत्रका किसान घर व्यवहार चलाउने आम्दानीको राम्रो स्रोत बनेको छ । अदुवा कारोबारीले वषिर्क करोडौं कमाउने गरेका छन् ।

नवलपरासीमा खरिद गर्ने व्यापरीले भारतको गोरखपुरसम्म पुर्याएर १० गुणा बढी मूल्यमा बिक्री गर्छन् । अदुवा व्यापारमा भारतीयले पैसा लगानी गरेर नेपाली बिचौलियालाई काममा लगाउँछन् । पहाडी गाविस नरम, जौबारी, अर्खला, भारतीपुर, मिथुकरम, रुचारु, रकुवा, बुलिङटार, डाँडाझेरी, कोटथर, रतनपुर, हुप्सेकोट, धुरकोट, धौवादी, राकाचुलीलगायत गाविसमा अदुवा खेती हुने गरेको कृषि कार्यालयको तथ्यांक छ । ती गाविसमा सुन्तला खेती पनि उत्तिकै हुने गरेको छ ।

त्यहाँको १ हजार ३ सय हेक्टरमा अदुवा हुने गरेको कृषि कार्यालयले जनाएको छ । कार्यालयका अनुसार जिल्लामा यस वर्ष १८ हजार ५ सय टन अदुवा उत्पादन भएको छ । मूल्य स्थिर नभए पनि गत वर्षको तुलनामा यस वर्ष किसानले झन्डै तेब्बर मोल पाएका छन् । अन्य समुदायको तुलनामा मगर समुदायका बासिन्दा यो खेतीमा संलग्न छन् । पहाडी क्षेत्रमा खेती गरिने हुँदा यहाँको अदुवा सत प्रतिशत अर्गानिक रूपमा उत्पादन हुने गरेको छ ।